ករណីមិនធានាសម្រាប់ អត្ថប្រយោជន៍លើកលែងបុព្វលាភធានារ៉ាប់រង លើជំងឺធ្ងន់ធ្ងរកម្រិតធ្ងន់ (ម្ចាស់បណ្ណសន្យារ៉ាប់រង)
ពុំមានបុព្វលាភធានារ៉ាប់រងណាមួយ នឹងត្រូវបានលើកលែងឡើយ ប្រសិនបើព្រឹត្តិការណ៍ដែលត្រូវបានធានានោះ បង្កឡើងដោយផ្ទាល់ ឬដោយប្រយោល ទាំងស្រុង ឬដោយផ្នែក ពីមូលហេតុណាមួយដែលបានកំណត់ខាង ក្រោម។ ក្នុងករណីការបដិសេធការលើកលែងបុព្វលាភធានារ៉ាប់រងនោះ បណ្ដាលឱ្យផលិតផលធានារ៉ាប់រងបន្ថែមនេះ ត្រូវបញ្ចប់សុពលភាព នោះទំនួលខុសត្រូវរបស់ក្រុមហ៊ុនដែលមានក្រោមបណ្ណសន្យារ៉ាប់រងនេះ ត្រូវកំណត់ត្រឹមការបង្វិលបុព្វលាភធានារ៉ាប់រងដែលបានបង់រួចសរុបសម្រាប់ផលិតផលធានារ៉ាប់រងបន្ថែមនេះ គិតចាប់ពីកាលបរិច្ឆេទផ្ដល់ជូនផលិតផលធានារ៉ាប់រងបន្ថែម ឬកាលបរិចេ្ឆទផ្ដល់សុពលភាពផលិតផលធានារ៉ាប់រងបន្ថែមជាថ្មីឡើងវិញ (កំណត់យកកាលបរិច្ឆេទណាមួយចុងក្រោយ) ជូនម្ចាស់បណ្ណសន្យារ៉ាប់រងវិញ ដោយដកចេញនូវការចំណាយលើការពិនិត្យសុខភាព (បើមាន) និង/ឬ ចំណាយផ្សេងៗ ដែលសមរម្យ ហើយកើតឡើងសម្រាប់ការវាយតម្លៃហានិភ័យ (បើមាន)។
ករណីមិនធានាចំពោះករណីជំងឺធ្ងន់ធ្ងរ
ក. រាល់ជំងឺ ឬស្ថានភាពដែលមានពីមុនស្រាប់ និងផលវិបាក/ជំងឺណាមួយ ដែលទាក់ទងនឹងជំងឺ/ស្ថានភាពដែលមានពីមុនស្រាប់ ឬ
ខ. រាល់ជំងឺធ្ងន់ធ្ងរ ឬរោគសញ្ញាណាមួយនៃជំងឺធ្ងន់ធ្ងរដែលបានស្ដែងចេញ ឬការធ្វើរោគវិនិច្ឆ័យរកឃើញថាមានជំងឺធ្ងន់ធ្ងរក្នុងអំឡុងរយៈពេលមិនធានា រួមបញ្ចូលទាំងជំងឺធ្ងន់ធ្ងរកម្រិតដំបូងណាមួយ ដែលត្រូវបានធ្វើរោគវិនិច្ឆ័យរកឃើញលើកដំបូងក្នុងអំឡុងរយៈពេលមិនធានា ហើយលូតលាស់ទៅជាជំងឺធ្ងន់ធ្ងរកម្រិតធ្ងន់ ក្រោយរយៈពេលមិនធានាត្រូវបានបញ្ចប់ ឬ
គ. ជំងឺមានពីកំណើត ឬពិការភាពពីកំណើត ឬ
ឃ. ជំងឺអេដស៍ (AIDS) ឬផលវិបាក/ជំងឺណាមួយ ដែលទាក់ទងនឹងមេរោគហ៊ីវ (HIV) លើកលែងតែករណីការឆ្លងមេរោគហ៊ីវ (HIV) តាមរយៈការបរិច្ចាគឈាម ឬតាមការប្រកបវិជ្ជាជីវៈ ឬ
ង. ជំងឺធ្ងន់ធ្ងរណាមួយដែលបណ្តាលមកពីការប៉ុនប៉ងសម្លាប់ខ្លួន ការប៉ុនប៉ងធ្វើបាបខ្លួនឯង ឬបង្ករបួសលើខ្លួនឯងដោយចេតនា ទោះបីជាម្ចាស់បណ្ណសន្យារ៉ាប់រងស្ថិតនៅក្នុងស្ថានភាពផ្លូវចិត្តប្រក្រតី ឬមិនប្រក្រតីក៏ដោយ ឬ
ច. ជំងឺធ្ងន់ធ្ងរណាមួយដែលបណ្តាលមកពីការស្ម័គ្រចិត្តប្រើប្រាស់ សេព ឬស្រូប ឱសថ ឬគ្រឿងញៀនដែលគ្មានវេជ្ជបញ្ជា សារជាតិស្រវឹង ថ្នាំពុល ឧស្ម័ន ឬផ្សែងពុល ឬសារជាតិពុលផ្សេងៗ ឬ
ឆ. ជំងឺធ្ងន់ធ្ងរណាមួយដែលបណ្តាលមកពីសង្រ្គាម ឬអំពើណាមួយដែលមានលក្ខណៈដូចគ្នានឹងសង្រ្គាម (បើទោះជាត្រូវបានប្រកាស ឬមិនប្រកាសក៏ដោយ) ឬកុបកម្ម ឬការបះបោរ ឬចលាចលសង្គម ឬកូដកម្ម ឬសកម្មភាពភេរវកម្ម បើទោះបីជាអ្នកត្រូវបានធានារ៉ាប់រងបានចូលរួម ឬមិនចូលរួមក្នុងអំពើទាំងនោះក្ដី ឬ
ជ. ជំងឺធ្ងន់ធ្ងរណាមួយដែលបណ្តាលមកពីការប្រព្រឹត្ត ឬប៉ុនប៉ងប្រព្រឹត្តបទល្មើសព្រហ្មទណ្ឌណាមួយ ដោយម្ចាស់បណ្ណសន្យារ៉ាប់រង ឬអ្នកត្រូវបានធានារ៉ាប់រង ឬអ្នកទទួលសំណង (សូមយោងទៅផ្នែកទី 8. លក្ខណ:សម្បត្តិអ្នកទទួលផល ឬអ្នកទទួលសំណង) ឬ
ឈ. ជំងឺធ្ងន់ធ្ងរណាមួយដែលបណ្តាលមកពីការចូលរួម ឬចូលរួមចំណែកក្នុងការបើកបរ ឬជិះក្នុងការប្រណាំងប្រភេទណាមួយ ឬសកម្មភាពមុជក្រោមទឹក ឬធ្វើសកម្មភាពណាដែលមានហានិភ័យខ្ពស់ ដូចជាការឡើងភ្នំ (mountaineering) ឬការចូលក្នុងរូងភ្នំ (potholing) ឬការជិះឆ័ត្រយោង (parachuting) ឬការលោតពីទីខ្ពស់ (bungee jumping) ឬ
ញ. ជំងឺធ្ងន់ធ្ងរណាមួយដែលបណ្តាលមកពីការធ្វើដំណើរ ឬការហោះហើរ ក្នុងយានយន្ត ឬដោយមធ្យោបាយផ្លូវអាកាសណាមួយ លើកលែងតែជាអ្នកដំណើរធម្មតាលើយន្តហោះរបស់ក្រុមហ៊ុនអាកាសចរណ៍ដែលមានប្រតិបត្តិការជាទៀងទាត់ ឬ
ដ. ជំងឺ ឬស្ថានភាពណាមួយ ដែលបានបញ្ជាក់ថាមិនត្រូវបានធានាក្រោមនិយមន័យនៃជំងឺ/ស្ថានភាពធ្ងន់ធ្ងរ ដែលត្រូវបានធានានីមួយៗ។