មេនូឡាយហ្វ៍ និងអាជ្ញាធរជាតិអប្សរា ​សហការលើគម្រោងឧទ្យានសហគមន៍ អង្គរ-មេនូឡាយហ៍្វ​ ដើម្បី​អភិរក្សរមណីយដ្ឋានអង្គរ​

ខេត្តសៀមរាប – ក្រុមហ៊ុន មេនូឡាយហ្វ៍ ខេមបូឌា ដែលជាក្រុមហ៊ុនធានារ៉ាប់រងអាយុជីវិតអន្តរជាតិដំបូងបង្អស់នៅកម្ពុជា និងអាជ្ញាធរជាតិអប្សរា បានរៀបចំពិធីប្រគល់កិច្ចព្រមព្រៀង និងសម្ពោធជាផ្លូវការគម្រោង «ឧទ្យានសហគមន៍អង្គរ-មេនូឡាយហ្វ៍​ (Angkor Manulife Community Park)” ​ដែលជាគម្រោង​ដាំ និងថែទាំដើមឈើចំនួនជាង ១០ ០០០ ដើម លើផ្ទៃដីជាង ៥.៥ ហិកតា​ ដែលមានទីតាំងនៅក្បែរបរិវេណប្រាសាទបន្ទាយប្រី​ដើម្បី​អភិរក្សរមណីយដ្ឋានអង្គរដែលជាសម្បត្តិបេតិកភណ្ឌពិភពលោកពីការគំរាមកំហែង​បម្រែបម្រួលអាកាសធាតុ។​

កម្មវិធីនេះប្រព្រឹត្តទៅ​ក្រោមអធិបតីភាព​ដ៏ខ្ពង់ខ្ពស់​ លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា ដោយមានការចូលរួមពី​លោក ជំទាវ ម៉ុម ថានី រដ្ឋលេខាធិការ តំណាង ឯកឧត្តម អ៊ាង សុផល្លែត រដ្ឋមន្ត្រី ក្រសួង បរិស្ថាន ឯកឧត្តមបណ្ឌិត ហង់ ពៅ អគ្គនាយកអាជ្ញាធរជាតិអប្សរា ​លោក អ៊ឹង គឹមលាង អភិបាលរងតំណាង ឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប លោកស្រី ង៉ាន់ លក្ខិណា ប្រធាននាយកដ្ឋានកិច្ចការទូទៅ តំណាង ឯកឧត្តម ប៊ូ ចាន់ភីរូ អគ្គនាយក នៃនិយ័តករធានារ៉ាប់រងកម្ពុជា តំណាងអង្គការ UNESCO ប្រចាំកម្ពុជា ​លោក ចាន់ រដ្ឋា អគ្គនាយក​ ក្រុមហ៊ុន មេនូឡាយហ្វ៍ ខេមបូឌា​ ព្រមទាំងថ្នាក់ដឹកនាំ បុគ្គលិក ភ្នាក់ងារធានារ៉ាប់រង អតិថិជនរបស់ ក្រុមហ៊ុន មេនូឡាយហ្វ៍ និងអគ្គនាយករង ប្រធាននាយកដ្ឋាន អនុប្រធាននាយកដ្ឋាន បុគ្គលិក ពលករនៃអាជ្ញាធរជាតិអប្សរា នគរបាលការពារបេតិកភណ្ឌ អាជ្ញាធរមូលដ្ឋាន ក៏ដូចជាសិស្សានុសិស្សចំនួនប្រមាណ ៣០០ នាក់ផងដែរ។​​

ថ្លែងក្នុងពិធីប្រគល់កិច្ចព្រមព្រៀង និងសម្ពោធគម្រោង លោកជំទាវ បណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាល នៃអាជ្ញាធរជាតិអប្សរា មានប្រសាសន៍ថា​ “ដើមឈើរាប់លានដើម ទាំងក្នុងគម្រោងរបស់ក្រុមហ៊ុនមេនូឡាយហ្វ៍ រួមទាំងវិស័យឯកជននានា ដែលបានសហការជាមួយអាជ្ញាធរជាតិអប្សរា ដាំដុះជាបន្តបន្ទាប់នៅក្នុងឧទ្យានអង្គរ។ នេះជាភារកិច្ចថ្មីមួយទៀត បន្ថែមលើកិច្ចការដែលយើងជាកូនខ្មែរត្រូវថែរក្សាបរិស្ថាន។ ហេតុអ្វី? ដោយសារនៅលើទឹកដីនេះ មានប្រាសាទរាប់រយ ដែលប្រាសាទ គឺជាចំណងមួយរវាងប្រាសាទ ធម្មជាតិ និងមនុស្ស។ អ្វីទាំងអស់នោះ បើសិនជាគ្មានព្រៃឈើជួយទេ បញ្ហាវានឹងកកើតឡើងដូចជា ភាពរាំងស្ងួត ហើយបរិស្ថានបៃតងជួយច្រើនលើសុខុមាលភាពរបស់មនុស្ស។ លោកជំទាវបណ្ឌិតសភាចារ្យ បានសម្តែងសេចក្តីរីករាយ ដែលរាជដ្ឋាភិបាល យកចិត្តទុកដាក់លើការបង្កើនគម្របព្រៃឈើ ហើយសកម្មភាពនេះ កាន់តែផុសផលច្រើនឡើង ពិសេសក្នុងចំណោមយុវជន។ លោកជំទាវ បណ្ឌិតសភាចារ្យ មានប្រសាសន៍បន្តថា អ្នកជំនាន់ក្រោយរស់នៅបានដោយសារសមិទ្ធផលរបស់អ្នកមុន នេះជាបំណងយើងទាំងអស់គ្នាបានទទួលនូវភោគផលដែលដូនតាយើងបន្សល់ទុកមក មានប្រាង្គប្រាសាទ មានសម្បត្តិធម្មជាតិ។ ដូច្នេះ ជាភារកិច្ចរបស់យើងថែរក្សា ក៏មានភារកិច្ចនឹងបន្តបង្កើតនូវអ្វីសម្រាប់ទុកឱ្យអ្នកជំនាន់ក្រោយដែរ។”​​

លោក ចាន់ រដ្ឋា អគ្គនាយក​ ក្រុមហ៊ុន មេនូឡាយហ្វ៍ ខេមបូឌា មានប្រសាសន៍ផងដែរថា “ជាកិត្តិយស និងមោទកភាពណាស់ ដែលក្រុមហ៊ុន មេនូឡាយហ្វ៍ ទទួលបានការអនុញ្ញាត និងគាំទ្រពីអាជ្ញាធរជាតិអប្សរា​ក្នុងកិច្ចការពារ​បេតិកភណ្ឌវប្បធម៌ជាតិដ៏មានតម្លៃសម្រាប់មនុស្សជាតិ ​ជាពិសេសប្រជាជនដែលកំពុងរស់នៅ និងប្រកបការងារជុំវិញរមណីយដ្ឋានអង្គរ។ ទិសដៅនេះបានដើរស្របគ្នាយ៉ាងល្អឥតខ្ចោះទៅនឹងបេសកកម្មរបស់ក្រុមហ៊ុន មេនូឡាយហ្វ៍ ជាសកល (Manulife Impact Agenda) ក្នុង​ការកសាងជីវិតប្រកបដោយសុខភាពល្អ ភាពរឹងមាំយូរអង្វែង និងកាន់តែប្រសើរជូនប្រជាជននៅទូទាំងពិភពលោក​រួមទាំងប្រទេសកម្ពុជាផងដែរ។”

គួរបញ្ជាក់ផងដែរថា ក្រុមហ៊ុន Manulife នៅទូទាំងសកលលោកបានចូលរួមយ៉ាងសកម្មក្នុងសកម្មភាពគាំទ្រសហគមន៍ក្រោមគោលដៅ​នៃការជំរុញអនាគតប្រកបដោយចីរភាព និងលើកកម្ពស់​សុខភាព និងសុខុមាលភាពប្រជាជន តាមរយៈគំនិតផ្តួចផ្តើម​ជាច្រើនទៀត​នៅក្រោមភាពជាដៃគូរវាង មេនូឡាយហ្វ៍ និងវេទិកា​សេដ្ឋកិច្ច​ពិភពលោក (World Economic Forum) ផងដែរ​។ ​​ជាក់ស្តែង ដើមឈើជាង ១,៣ ពាន់លានដើមត្រូវបានដាំ​ដោយ ​ក្រុមហ៊ុន ​ចាប់តាំងពីឆ្នាំ ១៩៨៥ មក​។

ដើម្បីទទួលព័ត៌មានបន្ថែម និងព័ត៌មានថ្មីៗពី​ក្រុមហ៊ុន​ មេ​នូ​ឡាយ​ហ្វ៍​ ខេមបូឌា  សូម​​តាម​ដាន​ទំ​ព័រហ្វេសប៊ុក «Manulife Cambodia»  តាម​រយៈ www.facebook.com/ManulifeKH ឬ ​ចូល​ទៅកាន់​គេហ​ទំ​ព័រ www.manulife.com.kh។