Manulife ផ្តល់ជំនួយជាទឹកប្រាក់ 1,000,000 ដុល្លារអាមេរិកដល់អង្គការ Kiva ដើម្បីជំរុញសេដ្ឋកិច្ចប្រកបដោយបរិយាប័ន្នដល់​ទីផ្សារកំពុងរីកចម្រើននៅតំបន់អាស៊ី 

ថ្ងៃទី៤ ខែតុលា ឆ្នាំ២០២៣

ជាផ្នែកមួយនៃភាពជាដៃគូនេះ មូលនិធិផ្គូផ្គងរបស់ក្រុមហ៊ុន Manulife (Manulife Match Fund) នឹងត្រូវដាក់ឲ្យប្រើប្រាស់ដើម្បីផ្តល់ទុនដល់សហគ្រិនខ្នាតតូច និងសហគមន៍ពុំទទួលបានជំនួយគ្រប់គ្រាន់​​នៅលើគេហទំព័​ផ្តល់ហិរញ្ញប្បទាន (crowdfunding) ​របស់ Kiva ​ដែលនឹងផ្ដល់ភាពងាយស្រួលក្នុងការ​ផ្តល់មូលនិធិបានឆាប់រហ័ស និងផ្ដល់ឱកាសសម្រាប់បុគ្គល និងសហគមន៍ដែលគ្មានលទ្ធភាពទទួលបាន​សេវាហិរញ្ញវត្ថុតាមវិធីសាស្រ្តចាស់​ផងដែរ។ នៅពេលដែលឥណទានត្រូវបានទូទាត់សងមកវិញរួចរាល់ នោះប្រាក់មូលនិធិនឹងត្រូវបង្វិលជូនមូលនិធិផ្គូផ្គងរបស់ក្រុមហ៊ុន Manulife វិញ ហើយនឹងត្រូវបែងចែកទៅឱ្យសហគ្រិនខ្នាតតូចថ្មីៗទៀត។ ដោយប្រើប្រាស់ជាមូលនិធិទុនបង្វិលមួយ មូលនិធិផ្គូផ្គងរបស់ក្រុមហ៊ុន Manulife ជាមួយអង្គការ​ Kiva អាចដើរតួនាទីយ៉ាងសំខាន់ក្នុងការបង្កើនមូលនិធិសរុបដែលមានស្រាប់ និងការផ្តល់ឥណទានដល់សហគ្រិនបានកាន់តែឆាប់រហ័ស។

កិច្ចសហការនេះក៏នឹងអនុញ្ញាតឲ្យអង្គការ Kiva ធ្វើការសិក្សាលើទិន្នន័យសំខាន់ៗ និងផ្សព្វផ្សាយចំណេះដឹងសំខាន់ៗដល់ភាគីអ្នកខ្ចី ក៏ដូចជា​លើកកម្ពស់​ចំណេះដឹងមូលដ្ឋានពាក់ព័ន្ធនឹងបរិយាប័ន្នហិរញ្ញវត្ថុ ដើម្បីប្រាកដថា Kiva អាចបន្តជួយដៃគូផ្ដល់ឥណទាន​ឱ្យទទួលបានលទ្ធផល​សម្រាប់ភាគីអ្នកខ្ចី។

ការគាំទ្រពីក្រុមហ៊ុន Manulife នេះបានដើរស្របគ្នាយ៉ាងល្អឥតខ្ចោះទៅនឹងគោលដៅយុទ្ធសាស្រ្តមួយក្នុងចំណោមគោលដៅផ្សេងទៀតរបស់​ Manulife Impact Agenda ដែលមានគោលបំណងជំរុញឱ្យមានឱកាសផ្នែកសេដ្ឋកិច្ចប្រកបដោយបរិយាប័ន្ន ដើម្បីបង្កើតបរិយាកាស​មួយដែលស្មើភាពគ្នា។ តាមរយៈភាពជាដៃគូជាមួយ Kiva ក្រុមហ៊ុន Manulife នឹងជួយពន្លឿនការលើកកម្ពស់សហគមន៍ដែលពុំសូវមានឱកាស  និងធ្វើឲ្យ​ដំណោះស្រាយហិរញ្ញវត្ថុកាន់តែងាយស្រួលទទួលបាន។​

អ្នកស្រី Sarah Chapman, Manulife Global Chief Sustainability Officer បានមានប្រសាសន៍ថា “យើងខ្ញុំមានមោទកភាពចំពោះការចាប់ដៃគូ​ជាមួយអង្គការ Kiva ដែលនឹងជួយសហគ្រិនក្នុងការទទួលបានធនធានហិរញ្ញវត្ថុដែលគាត់ត្រូវការ ដើម្បីកសាងសហគ្រាសដែលមានភាពរីកចម្រើន និងកែប្រែមុខមាត់សហគមន៍របស់ខ្លួន។ ការគាំទ្រនេះបានបង្ហាញពីអត្ថប្រយោជន៍នៃការផ្តល់ជំនួយហិរញ្ញវត្ថុរួម​គ្នា ដែលអនុញ្ញាតឲ្យយើងជួយ​ដល់បុគ្គល និងសហគមន៍​ក្នុងទីផ្សារកំពុងរីកចម្រើននៅតំបន់អាស៊ី។ ស្របពេលដែលភាពជាដៃគូមួយនេះកំពុងលេចរូបរាង​ឡើង យើងខ្ញុំមានក្ដីសោមនស្សរីករាយក្នុងការពង្រឹងទំនាក់ទំនងជាមួយអតិថិជន បុគ្គលិក ភ្នាក់ងារធានារ៉ាប់រង និងភាគីពាក់ព័ន្ធទាំងអស់​តាមរយៈ​សកម្មភាពផ្សេងទៀតនៃយុទ្ធនាការនេះ​។

លោក Vishal Ghotge នាយកប្រតិបត្តិរបស់ក្រុមហ៊ុន Kiva បានបង្ហាញចំណាប់អារម្មណ៍ថា “ក្រុមហ៊ុន Kiva មានក្តីសោមនស្សរីករាយក្នុងការចាប់ដៃគូជាមួយក្រុមហ៊ុន Manulife ដើម្បីពង្រីកវិសាលភាពការងាររបស់យើងក្នុងការរួមចំណែក បង្កើតពិភពលោកប្រកបដោយបរិយាប័ន្ន​ផ្នែកហិរញ្ញវត្ថុ ដែលមនុស្សគ្រប់រូប​មានសិទ្ធិរស់នៅជីវិតកាន់​ប្រសើរឡើង។ គំនិតផ្តួចផ្តើមរបស់អង្គការ Kiva ផ្តល់លទ្ធភាព​ដល់បុគ្គល ​និងនាំមកនូវការផ្លាស់ប្តូរជាប្រព័ន្ធតាមរយៈសកម្មភាពតូចទៅមុន៖ ​ដូចជាក្រុមហ៊ុន Manulife ជាដើម ដែលចង់នាំមកនូវការផ្លាស់ប្តូរ និងសម្រាប់សហគ្រិនដែលត្រូវការជំនួយហិរញ្ញវត្ថុ ​ក្នុងការផ្លាស់ប្ដូរជីវិត​ឱ្យកាន់ប្រសើរឡើង។ យើងខ្ញុំពិតជាមានកិត្តិយសណាស់ក្នុងការចាប់ដៃគូជាមួយក្រុមហ៊ុន Manulife ដើម្បីសម្រេចឱ្យបាននូវចក្ខុវិស័យរួមនេះ ដើម្បីឆ្ពោះទៅរកអនាគតហិរញ្ញវត្ថុមួយប្រកបដោយសមធម៌។”

អង្គការ Kiva ត្រូវ​បាន​បង្កើត​ឡើងក្នុង​ឆ្នាំ 2005 ក្នុង​នាម​ជា​ក្រុមហ៊ុន​ផ្តល់​មូលនិធិដំបូងគេដែលត​ភ្ជាប់ទំនាក់ទំនងរវាង​ស្ថាប័នផ្តល់កម្ចី​​ជាមួយ​នឹង​សហគ្រិន និង​សហគមន៍​នៅជុំវិញ​ពិភពលោក។ ប្រជាជនជាង 2 លាននាក់បានវិនិយោគជាទឹកប្រាក់ 2ពាន់លានដុល្លារអាមេរិក ដើម្បីសម្រេចក្ដីសុបិន និងអាជីវកម្ម ហើយមានវិសាលភាពលើ​ 90 ប្រទេស និង​អ្នកខ្ចីចំនួន 4.7 លាននាក់។ តាមរយៈ Kiva ក្រុមហ៊ុន Manulife បានផ្តល់មូលនិធិ​យ៉ាងច្រើនដល់សហគ្រិន និងអ្នកខ្ចី​នៅតំបន់អាស៊ី រួមទាំងអ្នកស្រី សុខខឿន (Sokkhoerun) និងអ្នកស្រី វ៉ាន់នី (Vanny) ផងដែរ ក្នុងការចាប់ផ្តើម ឬពង្រីកអាជីវកម្ម ទទួលការបណ្តុះបណ្តាល ឬ​បញ្ចេញសក្ដានុពលរបស់ខ្លួន។ 

ករណីសិក្សាទី 1៖ ការគាំទ្រកសិករជាស្រ្តីក្នុងការពង្រីកអាជីវកម្មរបស់គាត់ក្នុងប្រទេសកម្ពុជា[1]

អ្នកស្រី សុខខឿន ​មានវ័យ 51ឆ្នាំ​ មកពីជនបទក្នុង​ប្រទេស​កម្ពុជា។ គាត់​មានស្វាមី និង​​កូន​ចំនួនបី​នាក់ និងប្រកបរបរជា​កសិករ​ជាង​ ៦ ឆ្នាំ​មក​ហើយ។ យ៉ាងណាមិញ ការកើនឡើងនៃគូប្រជែង និងកង្វះខាតដើមទុន គឺជាបញ្ហាចម្បងបំផុតរបស់គាត់។ ដោយមើលឃើញពីសក្តានុពលនៃចីរភាពកសិកម្ម គាត់បានដាច់ចិត្តខ្ចីប្រាក់ 1,225 ដុល្លារអាមេរិក ដើម្បីទិញជីបន្ថែមសម្រាប់កសិដ្ឋានរបស់គាត់។ តាមរយៈជំនួយហិរញ្ញវត្ថុនេះ គាត់អាចរកប្រាក់ចំណូលបានគ្រប់គ្រាន់ដើម្បីពង្រីកអាជីវកម្ម ពង្រីកហាង តុបតែងកែលម្អផ្ទះរបស់គាត់ និងបញ្ជូនកូនៗរបស់គាត់ឱ្យរៀនដល់ថ្នាក់ឧត្តមសិក្សាផងដែរ។

[1] សូមចូលទៅកាន់គេហទំព័ររបស់ក្រុមហ៊ុន Kiva ដើម្បីទទួលបានព័ត៌មានបន្ថែមពាក់ព័ន្ធនឹងករណីសិក្សានេះ៖ https://www.kiva.org/lend/2629200

ករណីសិក្សាទី 2៖ ការជួយសហគ្រិនស្រ្តីនៅកម្ពុជាឱ្យបំពេញតម្រូវការអតិថិជន និងបង្កើនប្រាក់ចំណូល[2]

អ្នកស្រី វ៉ាន់នី (Vanny) ជា​សហគ្រិនស្រ្តី​ម្នាក់​ដែល​ឧស្សាហ៍​ព្យាយាម​ ហើយបានប្រើប្រាស់ពេលវេលាពេញមួយ​ជីវិតរបស់គាត់​ប្រកបមុខរបរជា​អ្នក​លក់​គ្រឿងទេស។ អាជីវកម្ម​នេះ​ជួយ​ក្រុម​គ្រួសារ​របស់​គាត់ក្នុងការបំពេញតម្រូវការជាមូលដ្ឋាននានា និងជួយឱ្យ​កូនៗ​របស់គាត់​បាន​ទៅ​សាលារៀនផងដែរ។ គាត់ផ្គត់ផ្គង់ទំនិញដល់ហាងលក់គ្រឿងទេសតូចៗនៅក្នុងស្រុករបស់គាត់។ ដោយសារ​ផលិតផល​របស់គាត់​មាន​តម្រូវការ​ខ្ពស់ គាត់អាចរក​ប្រាក់​ចំណេញ​បានយ៉ាង​ច្រើន។

អ្នកស្រី Vanny មានលទ្ធភាពសងប្រាក់កម្ចីពីមុនរបស់គាត់ដោយជោគជ័យ ដោយប្រាក់កម្ចីនោះបានជួយឱ្យគាត់អាចទិញទំនិញបានកាន់តែច្រើនបន្ថែមទៀតសម្រាប់ដំណើរការអាជីវកម្មលក់ដុំគ្រឿងទេស និងភេសជ្ជៈរបស់គាត់។ ដោយសង្ឃឹមថានឹងអាចពង្រីកអាជីវកម្មបន្ថែមទៀតនោះ គាត់បានស្នើសុំឱ្យ​ Kiva ផ្ដល់ប្រាក់កម្ចី ដើម្បីឱ្យគាត់បង្កើនទំនិញក្នុងស្ដុកលក់ដូរ​ ដែលកត្តានេះបានជួយបំពេញតម្រូវការអតិថិជនរបស់គាត់ និងជួយគាត់ទទួលបានប្រាក់ចំណេញកាន់តែច្រើន។ ប្រាក់កម្ចីដែលត្រូវបានសម្របសម្រួលផ្ដល់ជូនដោយក្រុមហ៊ុន Chamroeun Microfinancing Plc ដែលត្រូវជាដៃគូផ្តល់ឥណទានរបស់​ Kiva ផ្ដល់លទ្ធភាពឱ្យអាជីវករអាចទទួលបានទាំងសេវាកម្មបណ្តុះបណ្តាលផ្នែកអាជីវកម្ម និងសហគមន៍។ មូលនិធិនេះត្រូវបានរៀបចំឡើង ដើម្បីជួយឱ្យអាជីវករទូទាត់សងត្រលប់មកវិញ នៅពេលដែលពួកគាត់រំពឹងថាអាចទទួលបានប្រាក់ចំណូលពីការប្រមូលផល ដោយធានាថា ពុំមានការដាក់សម្ពាធបន្ថែមទៀតទៅលើលំហូរសាច់ប្រាក់ក្នុងក្រុមគ្រួសាររបស់គាត់ឡើយ។

[2] សូមចូលទៅកាន់គេហទំព័ររបស់ក្រុមហ៊ុន Kiva ដើម្បីទទួលបានព័ត៌មានបន្ថែមពាក់ព័ន្ធនឹងករណីសិក្សានេះ៖ https://www.kiva.org/lend/2625074

សម្រាប់ព័ត៌មាន​បន្ថែមអំពីការភាពជា​ដៃគូរបស់ក្រុមហ៊ុន Manulife និង Kiva សូមចូលទៅកាន់ www.kiva.org/manulifematchfund។

ដើម្បីទទួលព័ត៌មានបន្ថែម និងព័ត៌មានថ្មីៗពីក្រុមហ៊ុន មេនូឡាយហ្វ៍ ខេមបូឌា  សូមតាមដានទំព័រហ្វេសប៊ុក «Manulife Cambodia»  តាមរយៈ www.facebook.com/ManulifeKH ឬ ចូលទៅកាន់គេហទំព័រ www.manulife.com.kh។