ក្រុមហ៊ុន មេនូឡាយហ្វ៍ ខេមបូឌា រៀបចំកិច្ចប្រជុំជាយុទ្ធសាស្រ្តសម្រាប់ទីប្រឹក្សាធានារ៉ាប់រងឆ្នើម MDRT
សៀមរាប ថ្ងៃចន្ទ ទី ២១ ខែកុម្ភៈ ឆ្នាំ ២០២២៖ ក្រុមហ៊ុន មេនូឡាយហ្វ៍ ខេមបូឌា រៀបចំកិច្ចប្រជុំធំប្រចាំឆ្នាំ ២០២២ ឈ្មោះ «ថ្ងៃបង្កើនល្បឿន MDRT» ដែលជាជំនួបនៃទីប្រឹក្សាធានារ៉ាប់រងឆ្នើមដែលជាសមាជិកភាពលំដាប់ពិភពលោក MDRT និង COT ទាំងអស់ប្រចាំក្រុមហ៊ុន មេនូឡាយហ្វ៍ ខេមបូឌា តាំងពីឆ្នាំ ២០១៦ រហូតដល់បច្ចុប្បន្ន។ កិច្ចប្រជុំនេះក៏មានការចូលរួមដ៏ខ្ពង់ខ្ពស់ពីគណៈគ្រប់គ្រងប្រតិបត្តិរបស់ក្រុមហ៊ុន និងប្រធានផ្នែកលក់ឆ្នើមមកពីគ្រប់ការិយាល័យសាខាជាច្រើនរូប ជាពិសេសគឺវាគ្មិនកិត្តិយសពីក្រៅប្រទេសផងដែរ។
កម្មវិធីនេះរៀបចំឡើងដើម្បីរំលឹកពីផែនការយុទ្ធសាស្រ្ត លទ្ធផលរំពឹងទុក និងការបេ្តជ្ញាចិត្តរបស់ក្រុមហ៊ុនក្នុងការ ផ្តល់ការការពារអនាគតហិរញ្ញវត្ថុដ៏រឹងមាំជូនប្រជាពលរដ្ឋកម្ពុជាឲ្យបានកាន់តែច្រើនឡើងតាមរយៈទីប្រឹក្សាធានារ៉ាប់រងរបស់ក្រុមហ៊ុន។ ការជួបជុំនេះក៏ជាការឆ្លុះបញ្ចាំងផងដែរនូវការគាំទ្រយ៉ាងពេញទំហឹងរបស់ក្រុមហ៊ុនចំពោះការអភិវឌ្ឍទីប្រឹក្សាធានារ៉ាប់រងរបស់ខ្លួនឲ្យសមាជិកភាពលំដាប់ពិភពលោក MDRT, COT និង TOT សម្រាប់ឆ្នាំ ២០២៣ តាមរយៈការបណ្តុះបណ្តាល ការចែករំលែកចំណេះដឹង ការទទួលស្គាល់ កម្មវិធីលើកទឹកចិត្ត និងកម្មវិធីពិសេសៗជាច្រើនទៀត។
លើសពីនេះទៀត កម្មវិធីនេះក៏ត្រូវបានរៀបចំដើម្បីអបអរសាទរដល់ទីប្រឹក្សាធានារ៉ាប់រងឆ្នើមដែលជាសមាជិកភាពលំដាប់ពិភពលោក MDRT ឆ្នាំ ២០២២ ដែលក្នុងនោះមានដូចជា៖
- សមាជិកភាព “COT” និង “MDRT” ទាំង ២៥ រូប ប្រចាំឆ្នាំ ២០២២
- សមាជិកភាព MDRT រយៈពេល ៥ ឆ្នាំ និង ៦ ឆ្នាំជាប់គ្នាចំនួន ៣ រូប
- ប្រធានផ្នែកលក់ឆ្នើមដែលបានបង្កើតសមាជិកភាព “COT” និង “MDRT” ប្រចាំឆ្នាំ ២០២២ ចំនួន ១២ រូប
- ប្រធានផ្នែកលក់ឆ្នើមដែលជា “TOP MDRT BUILDER” ចំនួន ១ រូប និង “COT BUILDER” ចំនួន ១ រូបទៀត
បន្ថែមពីនេះ ក៏មានការចូលរួមពីសំណាក់វាគ្មិនកិត្តិយសចំនួន ៣ រូប ដែលមានបទពិសោធន៍ជាច្រើនឆ្នាំនៅក្នុងវិស័យធានារ៉ាប់រងអាយុជីវិតចូលរួមចែករំលែកនៅក្នុងកម្មវិធីផងដែរ រួមមាន៖
- លោក Lipson Ooi ជាអ្នកដឹកនាំវ័យក្មេងមួយរូបដែលមានបទពិសោធន៍ជាង ២០ ឆ្នាំ នៅក្នុងវិស័យធានារ៉ាប់រងអាយុជីវិត ហើយបានបង្កើតសមាជិក MDRT ចំនួន ១៩៥ រូប COT ចំនួន ១៤ រូប និង TOT ចំនួន ៤ រូប។
- អ្នកស្រី Ooi Ai Tee ជាអ្នកដឹកនាំឆ្នើមមួយរូបដែលបានបង្កើតសមាជិក MDRT ចំនួន ៤៣ រូប COT ចំនួន ៤ រូប និង TOT ចំនួន ២ រូប។
- អ្នកស្រី Ivy Siah ជាអ្នកដឹកនាំ និងជាទីប្រឹក្សាធានារ៉ាប់រងដ៏ឆ្នើមមួយរូបដែលបានជាប់ជាសមាជិក MDRT ចំនួន ៤ ដង COT ២ ដង និង TOT នៅក្នុងឆ្នាំ ២០២២។ អ្នកស្រីក៏បានបង្កើតសមាជិក MDRT ចំនួន ៤៣ រូប COT ៣ រូប និង TOT ចំនួន ១ រូបផងដែរ។
គួរបញ្ជាក់ផងដែរថា Million Dollar Round Table (MDRT) គឺជាសមាគមលំដាប់ពិភពលោកមួយសម្រាប់អ្នកឯកទេសផ្នែកហិរញ្ញវត្ថុឯករាជ្យ និងលំដាប់ពិភពលោកតែមួយគត់ដែលបច្ចុប្បន្នមានអ្នកឯកទេសនាំមុខគេក្នុងវិស័យធានារ៉ាប់រងអាយុជីវិត និងសេវាកម្មហិរញ្ញវត្ថុជាង ៦៥.០០០ នាក់ជាសមាជិក មកពីបណ្តាក្រុមហ៊ុនអន្តរជាតិជាង ៥០០ ក្រុមហ៊ុន និងមកពី ៧២ ប្រទេសរួមទាំងប្រទេសកម្ពុជាផងដែរ៕
ដើម្បីក្លាយជាទីប្រឹក្សាធានារ៉ាប់រងរបស់ ក្រុមហ៊ុន មេនូឡាយហ្វ៍ ខេមបូឌា សូមចូលទៅកាន់ https://www.manulife.com.kh/km/careers-with-us/insurance-advisor.html