ក្រុមហ៊ុន មេនូឡាយហ្វ៍ ខេមបូឌា រៀបចំ «កិច្ចប្រជុំប្រចាំឆ្នាំជាប្រវត្តិសាស្ត្រ» សម្រាប់បុគ្គលិកផ្នែកលក់តាមបណ្តាញធនាគារដៃគូ

រាជធានីភ្នំពេញ ថ្ងៃទី ១៨ ខែមិថុនា ឆ្នាំ២០២២៖ ក្នុងឱកាសប្រារព្ធខួប ១០ ឆ្នាំ ក្រុមហ៊ុន មេនូឡាយហ្វ៍ ខេមបូឌា បានរៀបចំកិច្ចប្រជុំប្រចាំឆ្នាំជាប្រវត្តិសាស្ត្រក្រោមប្រធានបទ «បង្កើនភាពនាំមុខ» (Extend the Lead) ដើម្បីអបអរសារទរដល់សមិទ្ធផលដើមឆ្នាំ ២០២២ របស់នាយកដ្ឋានភាពជាដៃគូចែកចាយតាមធនាគារ រួមមាន ធនាគារ ABA និង ធនាគារ ស្ថាបនា។

កម្មវិធីនេះត្រូវបានរៀបចំឡើងក្នុងគោលបំណងចែករំលែកបទពិសោធន៍ ក៏ដូចជាយុទ្ធសាស្ត្រថ្មីៗ ព្រមទាំងប្រគល់ពានរង្វាន់ និងជាពិសេសអបអរសាទរដល់មន្ត្រីជំនាញប្រឹក្សាធានារ៉ាប់រង ប្រធានផ្នែកលក់ និងប្រធានតំបន់ជាន់ខ្ពស់ផ្នែកលក់ឆ្នើមៗប្រមាណ ៣០ រូប ដែលប្រចាំការនៅដៃគូធនាគារទាំងពីរចំពោះភាពជោគជ័យ និងការសម្រេចបាននូវសមិទ្ធផលដ៏ត្រចះត្រចង់ក្នុងដើមឆ្នាំ ២០២២ ក្នុងបេសកកម្មចូលរួមចំណែកផ្តល់ការប្រឹក្សាយោលបល់ និងការការពារអនាគតហិរញ្ញវត្ថុជូនដល់ក្រុមគ្រួសារកម្ពុជា។

លោក ព្រូ ស៊ីថន នាយកគ្រប់គ្រងនាយកដ្ឋានចែកចាយតាមដៃគូធនាគារនៃក្រុមហ៊ុន មេនូឡាយហ្វ៍ ខេមបូឌា បានសម្តែងការកោតសរសើរថា៖

«ខ្ញុំបាទពិតជាមានមោទនភាពណាស់ចំពោះការជួបជុំដ៏ធំមួយនេះ ដែលមានវត្តមានក្រុមការងារបណ្តាញចែកចាយតាមដៃគូធនាគារមកពីគ្រប់បណ្តាសាខាទូទាំងប្រទេស។ ការជួបជុំនេះគឺជាកិច្ចប្រជុំជាប្រវត្តិសាស្រ្តលើកទី ១ ដែលរៀបចំឡើងដោយផ្ទាល់ក្នុងទ្រង់ទ្រាយធំ និងមានការពិសារអាហាររួមគ្នាដើម្បីរឹតចំណងមិត្តភាពការងារ ការថ្លែងអំណរគុណ និងការទទួលស្គាល់ចំពោះសមិទ្ធផលដ៏ធំធេងដែលមហាគ្រួសារនៃនាយកដ្ឋានចែកចាយតាមដៃគូធនាគារសម្រេចបានកន្លងមក ទោះស្ថិតក្នុងការរីករាលដាលនៃជំងឺកូវីដ ១៩ ក៏ដោយ។ ការជួបជុំនេះក៏មានទិសដៅផ្តល់ព័ត៌មាន យុទ្ធសាស្រ្តថ្មីៗ និងចែករំលែកបទពិសោធន៍ល្អៗរបស់ថ្នាក់ដឹកនាំជាន់ខ្ពស់របស់ មេនូឡាយហ្វ៍។ ខ្ញុំក៏សូមវាយតម្លៃខ្ពស់ចំពោះភាពជោគជ័យក្រោមការដឹកនាំ និងគាំទ្រពីនាយកផ្នែកលក់តាមធនាគារទាំង ២ និងក្រុមការងារជួរក្រោយគ្រប់ផ្នែក ដែលតែងតែគាំទ្រគ្នាទៅវិញទៅមកជារៀងរាល់ថ្ងៃដើម្បីធ្វើឲ្យក្តីសុបិនរបស់អតិថិជនយើងក្លាយជាការពិត។»