កម្មវិធីមួកសុវត្ថិភាពសម្រាប់គ្រួសារ ត្រូវបានពង្រីកទៅកាន់ខេត្តកំពង់ចាម
កំពង់ចាម, ថ្ងៃទី១១ ខែវិច្ឆិកា ឆ្នាំ២០១៧ - កម្មវិធីមួកសុវត្ថិភាពសម្រាប់គ្រួសារ ដែលទទួលបានការគាំទ្រពី ក្រុមហ៊ុន មេនូឡាយហ្វ៍ ខេមបូឌា បានប្រារព្ធពិធីអបអរខួប ៦ ឆ្នាំ របស់ខ្លួនតាមរយៈការពង្រីកការអប់រំអំពីសុវត្ថិភាព ចរាចរណ៍ទៅកាន់សាលាបឋមសិក្សាវាលវង់ ស្ថិតក្នុងខេត្តកំពង់ចាម។ ក្នុងឆ្នាំនេះកម្មវិធីបានផ្តល់មួកសុវត្ថិភាព ដែលមានគុណភាពជាង ១,០០០ មួកសុវត្ថិភាពដល់សិស្សានុសិស្ស លោកគ្រូអ្នកគ្រូ និងមាតាបិតាសិស្ស។ ជាមួយគ្នានេះដែរកម្មវិធីក៏ផ្តល់នូវការអប់រំដល់សិស្សានុសិស្ស សំដៅបង្កើនការយល់ដឹងរបស់ពួកគេអំពីសុវត្ថិភាពចរាចរណ៍ផងដែរ។
ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម បានមានប្រសាសន៍៖ «កាលពីឆ្នាំ២០១៦ មានមនុស្ស ៨៦ នាក់ បានស្លាប់ដោយសារគ្រោះថ្នាក់ចរាចរណ៍ នៅក្នុងខេត្តរបស់យើង ដែលចំនួននេះស្មើនឹង ៥ ភាគរយ នៃចំនួនអ្នកស្លាប់សរុបនៅទូទាំងប្រទេស។» ឯកឧត្តមអភិបាលបានបន្ថែមទៀតថា៖ «វាពិតជាមិនអាចទៅរួចទេ ក្នុងការវាស់វែងពីទំហំនៃការឈឺចាប់ និងការទទួលរងនូវការបាត់បង់ទាំងឡាយ បណ្តាលមកពីគ្រោះថ្នាក់ចរាចរណ៍។ ប៉ុន្តែការបំពេញការងារជាមួយអង្គការមូលនិធិបង្ការរបួសអាស៊ី និងក្រុមហ៊ុន មេនូឡាយហ្វ៍ ខេមបូឌា លើកម្មវិធីមួកសុវត្ថិភាពសម្រាប់ក្រុមគ្រួសារនេះ គឺជាជំហានដ៏សំខាន់មួយ ឆ្ពោះទៅធ្វើឱ្យការធ្វើចរាចរណ៍របស់ប្រជាពលរដ្ឋនៅក្នុងសហគមន៍របស់យើង កាន់តែមានសុវត្ថិភាព។»
លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការគណៈ កម្មាធិការជាតិ សុវត្ថិភាពចរាចរណ៍ផ្លូវគោក បានមានប្រសាសន៍ថា៖ «ជារៀងរាល់ឆ្នាំនៅកម្ពុជាមានអ្នកស្លាប់ ដោយសារគ្រោះថ្នាក់ចរាចរណ៍ប្រមាណជិត ២០០០ នាក់។» លោកជំទាវបានមានប្រសាសន៍បន្ថែមទៀតថា៖ «ដោយសារទោចក្រយានយន្ត(ម៉ូតូ) និង ទោចក្រយានយន្តសណ្តោងរ៉ឺម៉ក មានរហូតដល់ទៅ ៨៣ ភាគ រយនៃយានយន្តសរុបដែលកំពុងធ្វើចរាចរណ៍នៅលើដងផ្លូវក្នុងប្រទេសកម្ពុជា ដូច្នេះកម្មវិធីមួកសុវត្ថិភាព សម្រាប់គ្រួសារពិតជាមានសារៈសំខាន់ណាស់ ក្នុងការកសាងចំណេះដឹងសុវត្ថិភាពចរាចរណ៍ និងធ្វើឱ្យកុមាររបស់យើងកាន់តែមានសុវត្ថិភាព។ ខណៈដែលកម្មវិធីនេះបន្តសកម្មភាពរបស់ខ្លួន ចំនួនមួកសុវត្ថិភាពដែលផ្តល់ជូន ព្រមទាំងសកម្មភាពពង្រឹងការយល់ដឹងនឹងត្រូវបង្កើនហើយនឹងរួមចំណែកយ៉ាងសំខាន់ ក្នុងការកាត់បន្ថយចំនួនអ្នកស្លាប់ដោយគ្រោះថ្នាក់ចរាចរណ៍នៅកម្ពុជា។»
គិតចាប់ពីពេលប្រកាសផ្តើមអនុវត្តកម្មវិធីក្រោមភាពជាដៃគូ ជាមួយក្រុមហ៊ុនមេនូឡាយហ្វ៍ ខេមបូឌា កាលពីឆ្នាំ២០១២ កម្មវិធីមួកសុត្ថិភាពសម្រាប់គ្រួសារ បានផ្តល់មួកសុវត្ថិភាពប្រមាណជិត ៥០០០ មួក និងសិក្ខា សាលាបណ្តុះបណ្តាលអំពីសុវត្ថិភាពចរាចរណ៍ចំនួន ១៨ លើកដល់លោកគ្រូ អ្នកគ្រូ និងប្រជាពលរដ្ឋទូទៅ ប្រមាណ៦០០នាក់។
លោក Robert Elliott អគ្គនាយកប្រតិបត្តិ និងនាយកចាត់ការទូទៅនៃក្រុមហ៊ុន មេនូឡាយហ្វ៍ ខេមបូឌា បានមានប្រសាសន៍ថា៖ «យើងប្តេជ្ញាក្នុងការកសាងអនាគតដ៏ល្អប្រសើរ សម្រាប់គ្រួសារទាំងឡាយ នៅក្នុងសហគមន៍ដែលយើងកំពុងធ្វើប្រតិបត្តិការអាជីវកម្ម។ កម្មវិធីមួកសុត្ថិភាពសម្រាប់គ្រួសារនេះ គឺជាផ្នែកមួយដ៏សំខាន់ នៃកិច្ចខិតខំប្រឹងប្រែងរបស់យើង ដើម្បីធានាសុវត្ថិភាពជូនកុមារ និងក្រុមគ្រួសារកម្ពុជា តាមរយៈការផ្តល់ការអប់រំដល់ពួកគេអំពីសុវត្ថិភាពចរាចរណ៍ និងសារៈសំខាន់នៃការពាក់មួកសុវត្ថិភាព ដែលមានគុណភាព នៅពេលធ្វើដំណើរតាមម៉ូតូ ឬកង់នៅលើដងផ្លូវ។»
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជា បានមានប្រសាសន៍ថា៖ «សាលាបឋមសិក្សាវាលវង់ ត្រូវបានជ្រើសរើសមកអនុវត្តកម្មវិធី ដោយសារតែទីតាំងជាតំបន់ ដែលមានប្រឈមនឹង គ្រោះថ្នាក់ចរាចរណ៍ខ្ពស់ ហើយសិស្សានុសិស្សត្រូវធ្វើដំណើរទៅមក សាលារៀនតាមផ្លូវ ដែលមានចរាចរណ៍មមាញឹកនៅក្នុងខេត្ដ។ សិស្សានុសិស្សរបស់សាលារៀននេះ ប្រមាណ ៨០ ភាគរយធ្វើដំណើរទៅមកដោយជិះកង់ ឬតាមម៉ូតូជាមួយអាណាព្យាបាល។» លោកបានបញ្ជាក់ទៀតថា៖ «កាលពីឆ្នាំសិក្សា២០១៦-២០១៧ មានសិស្សានុសិស្ស៥នាក់ និងលោកគ្រូ អ្នកគ្រូចំនួន ៤ នាក់នៃសាលាបឋមសិក្សាវាលវង់ បានទទួលរងរបួសដោយសារគ្រោះថ្នាក់ចរាចរណ៍។ ដូច្នេះកម្មវិធីមួកសុវត្ថិភាពសម្រាប់គ្រួសារ នឹងផ្តល់មួកសុវត្ថិភាព ដែលមានគុណភាព រួមជាមួយនឹងការបណ្តុះបណ្តាល អំពីសុវត្ថិភាពចរាចរណ៍ដល់សិស្សានុសិស្ស លោកគ្រូ អ្នកគ្រូ និងអ្នករស់នៅក្នុងសហគមន៍ ដែលងាយរងគ្រោះបំផុត។»
ចូលរួមនៅក្នុងអង្គពិធីនេះរួមមាន៖ សិស្សានុសិស្ស លោកគ្រូ អ្នកគ្រូ មន្រ្តីរាជការ អ្នកសារព័ត៌មាន និងសមាជិកសហគមន៍ប្រមាណ ១០០០ នាក់។ គណៈអធិបតីក្នុងអង្គពិធីរួមមាន៖ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន ឯកឧត្តម គួច ចំរើន អភិបាលនៃគណៈអភិបាល ខេត្តកំពង់ចាម លោក Robert Elliott អគ្គនាយកប្រតិបត្តិ និងនាយកចាត់ការទូទៅនៃក្រុមហ៊ុន មេនូឡាយហ្វ៍ ខេមបូឌា និងលោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំប្រទេសកម្ពុជា។