អ្នករត់ប្រណាំងជាច្រើន បានត្រៀមខ្លួនរួចជាស្រេចសម្រាប់ ទិវារត់ប្រណាំងអន្តរជាតិពាក់កណ្ដាលម៉ារ៉ាតុងនៅអង្គរវត្ត លើកទី ២១
កីឡាការនីដំបូងបំផុតរបស់កម្ពុជាដែលបានចូលរួមក្នុងការរត់ប្រណាំងម៉ារ៉ាតុងអូឡាំពិកនឹងរត់ចម្ងាយ ២១ គីឡូម៉ែត្រ នៅក្នុងការរត់ប្រណាំងនេះ
សៀមរាប, កម្ពុជា – នៅថ្ងៃទី ៤ ខែធ្នូឆ្នាំនេះ អ្នករត់ប្រណាំងរាប់ពាន់នាក់ ដែលមកពីបណ្ដាប្រទេសនានាទូទាំងពិភពលោក នឹងធ្វើការរត់ប្រណាំង នៅឧទ្យានបុរេប្រវត្តិអង្គរក្នុងខេត្តសៀមរាប ដែលជាទីតាំងបេតិកភ័ណ្ឌពិភពលោក របស់អង្គការ UNESCO។ ឆ្នាំនេះជាខួបលើកទី ២១ ហើយរបស់ព្រឹត្តិការណ៍រត់ប្រណាំង ដ៏ល្បីល្បាញលំដាប់ពិភពលោកមួយនេះ។
ដោយមានការឧបត្ថម្ភធំ ដោយក្រុមហ៊ុន មេនូឡាយហ្វ៍ និងរៀបចំដោយគណៈកម្មាធិការជាតិអូឡាំពិកកម្ពុជា កម្មវិធីរត់ប្រណាំងនេះ មានគោលបំណងលើកកម្ពស់សុខភាព និងសុខុមាលភាព ព្រមទាំងធ្វើការប្រមូលមូលនិធិ ជូនដល់បណ្ដាអង្គការ ដែលធ្វើការគាំទ្រដល់កុមារ ដែលជួបការខ្វះខាត និងជនរងគ្រោះដោយសារគ្រាប់មីន ក្នុងប្រទេសកម្ពុជា ដែលក្នុងនោះរួមមាន មន្ទីរពេទ្យកុមារគន្ធបុផ្ផា មន្ទីរពេទ្យកុមារអង្គរ និងកាកបាទក្រហមកម្ពុជាជាដើម។
លោកស្រី លី ណារី ដែលបានបង្កើតប្រវត្តិសាស្ត្រដ៏អស្ចារ្យមួយ ដោយលោកស្រីបានក្លាយជាកីឡាការនីដំបូងបំផុត របស់កម្ពុជាដែលបានរត់ចម្ងាយឆ្ងាយ ក្នុងការរត់ប្រណាំងម៉ារ៉ាតុងអូឡាំពិកក្នុងឆ្នាំនេះនៅ Rio de Janeiro នឹងចូលរួមរត់ប្រណាំង ក្នុងព្រឹត្តិការណ៍នេះផងដែរ។
ឯកឧត្តម វ៉ាត់ ចំរើន អគ្គលេខាធិការ នៃគណៈកម្មាធិការជាតិអូឡាំពិកកម្ពុជា មានប្រសាសន៍ថា៖ «យើងកំពុងទន្ទឹងរង់ចាំ ដើម្បីប្រារព្ធខួបលើកទី ២១ នៃព្រឹត្តិការណ៍រត់ប្រណាំងអន្តរជាតិពាក់កណ្ដាលម៉ារ៉ាតុងនៅអង្គរវត្ត ហើយដោយមានការគាំទ្រយ៉ាងខ្លាំង ពីក្រុមហ៊ុន មេនូឡាយហ្វ៍ ខ្ញុំជឿជាក់ថាយើងនឹងអាចផ្ដល់បទពិសោធន៍ រត់ប្រណាំងដ៏អស្ចារ្យ ដែលពុំធ្លាប់មានពីមុនមក សម្រាប់អ្នកដែលចូលរួមរត់ប្រណាំងទាំងអស់ មកពីជុំវិញពិភពលោក។ យើងរត់ដើម្បីសុខភាព សុខុមាលភាព និងសហគមន៍ដែលកំពុងត្រូវការការគាំទ្ររបស់យើងខ្លាំងបំផុត។»
«ខ្ញុំសូមថ្លែងអំណរគុណដល់ក្រុមហ៊ុន មេនូឡាយហ្វ៍ ដែលបានជួយធ្វើឱ្យការរត់ម៉ារ៉ាតុងនេះ ក្លាយទៅជាកម្មវិធីប្រមូលមូលនិធិដ៏ធំបំផុតមួយ ក្នុងប្រទេសកម្ពុជាដើម្បីគាំទ្រដល់កុមារដែលជួបការខ្វះខាត និងជនពិការ។»
នេះជាឆ្នាំទីពីរហើយដែលក្រុមហ៊ុន មេនូឡាយហ្វ៍ បានធ្វើជាម្ចាស់ឧបត្ថម្ភធំ នៃព្រឹត្តិការណ៍នេះចាប់តាំងពីក្រុមហ៊ុននេះ បានចុះហត្ថលេខាព្រមព្រៀង លើការឧបត្ថម្ភរយៈពេល ៥ ឆ្នាំជាមួយគណៈកម្មាធិការជាតិអូឡាំពិកកម្ពុជា កាលពីខែកក្កដាឆ្នាំ ២០១៥។ ជាការរួមចំណែក ក្នុងការឧបត្ថម្ភនេះ ក្រុមហ៊ុន មេនូឡាយហ្វ៍ បានបរិច្ចាគជាទឹកប្រាក់ចំនួន ២៥ ០០០ ដុល្លារអាមេរិក ដល់មន្ទីរពេទ្យកុមារអង្គរកាលពីឆ្នាំមុន។
លោក Robert Elliott អគ្គនាយកប្រតិបត្តិ និងនាយកចាត់ការទូទៅ នៃក្រុមហ៊ុន មេនូឡាយហ្វ៍ ខេមបូឌា មានប្រសាសន៍ថា៖ «យើងមានមោទនភាពណាស់ ដែលមានឱកាសឧបត្ថម្ភព្រឹត្តិការណ៍ដ៏អស្ចារ្យមួយនេះ។ បន្ទាប់ពីប្រតិបត្តិការអាជីវកម្មរយៈពេល ៤ ឆ្នាំរបស់យើងនៅកម្ពុជា យើងនៅតែរក្សាឆន្ទៈដ៏មុះមុតរបស់យើង ក្នុងការកសាងអនាគតហិរញ្ញវត្ថុដ៏ប្រសើរ ជាងមុនសម្រាប់ក្រុមគ្រួសារកម្ពុជា។ យើងជឿជាក់ថាសុខភាព និងសុខុមាលភាពរបស់អតិថិជនរបស់យើង គឺជាកត្តាសំខាន់បំផុតដែលជួយយើងឱ្យសម្រេចទស្សនវិស័យរបស់យើងបាន។ ដូច្នេះហើយ ការគាំទ្រដល់កម្មវិធីមួយដែលអាចជួយលើកកម្ពស់សុខភាព និងសុខុមាលភាព ដូចជាកម្មវិធីរត់ប្រណាំងអន្តរជាតិពាក់កណ្ដាលម៉ារ៉ាតុងនៅអង្គរវត្តនេះ គឺស្របគ្នាល្អបំផុត ទៅតាមគោលដៅរយៈពេលវែងរបស់យើង។»
កាលពីឆ្នាំ ១៩៩៦ អ្នករត់ប្រណាំងប្រមាណ ៥០០ នាក់បានចូលរួមក្នុងការរត់ប្រណាំងនេះ ដែលជាលើកដំបូងបំផុត នៃការរៀបចំកម្មវិធីនេះឡើង ហើយចំនួននេះបន្តកើនឡើងជាលំដាប់ ជារៀងរាល់ឆ្នាំ។ កាលពីឆ្នាំមុន អ្នករត់ប្រណាំងចំនួន ៨៤៩៣ នាក់ដែលធ្វើដំណើរមកពី ៧៥ ប្រទេសបានអញ្ជើញចូលរួមក្នុងព្រឹត្តិការណ៍នេះ ដែលការចូលរួមនេះបានរួមចំណែកយ៉ាងសំខាន់ ក្នុងវិស័យទេសចរណ៍ក្នុងប្រទេសកម្ពុជា។
ការរត់ប្រណាំងលើចម្ងាយផ្លូវ ២១ គីឡូម៉ែត្រនឹងចាប់ផ្ដើម នៅច្រកខាងលិច នៃប្រាសាទអង្គរវត្ត ដែលជាវិមានសាសនាដ៏ធំបំផុតមួយ លើពិភពលោក និងត្រូវបានប្រារព្ធឡើង នៅឧទ្យានបុរេប្រវត្តិអង្គរ ដែលពោរពេញដោយទេសភាព ដ៏ស្រស់ត្រកាល ដែលបង្ហាញចេញពីប្រាសាទបុរាណនានានៅតំបន់នោះ។
ដើម្បីចូលរួមក្នុងព្រឹត្តិការណ៍ដ៏អស្ចារ្យនេះ សូមចុះឈ្មោះដោយចូលទៅកាន់ គេហទំព័រ www.cambodia-events.org
