ក្រុមហ៊ុន មេនូឡាយហ្វ៍ ប្រារព្ធខួប ៤ ឆ្នាំនៅព្រះរាជាណាចក្រកម្ពុជា
ភ្នំពេញ កម្ពុជា – ក្រុមហ៊ុន មេនូឡាយហ្វ៍ ខេមបូឌា បានប្រារព្ធខួប ៤ ឆ្នាំនៃប្រតិបត្តិការអាជីវកម្មរបស់ខ្លួន នៅក្នុងព្រះរាជាណាចក្រកម្ពុជាកាលពីថ្ងៃទី ២៥ ខែមិថុនា កន្លងមកនេះ ។ នៅខែមិថុនា ឆ្នាំ ២០១២ ក្រុមហ៊ុនបានចាប់ផ្តើមប្រតិបត្តិការអាជីវកម្មរបស់ខ្លួន នៅក្នុងព្រះរាជាណាចក្រកម្ពុជា ក្នុងនាមជាក្រុមហ៊ុនធានារ៉ាប់រងអាយុជីវិត លំដាប់ថ្នាក់អន្តរជាតិដែលមានភាគហ៊ុនបរទេស ១០០% ដំបូងគេ ក្នុងគោលបំណង ផ្ដល់ជូននូវដំណោះស្រាយធានារ៉ាប់រងអាយុជីវិត ដែលសមស្របតាមតម្រូវការហិរញ្ញវត្ថុ របស់ក្រុមគ្រួសារកម្ពុជា។ ការអបអរសាទរ នេះបានប្រារព្ធឡើងនៅសណ្ណាគារឡឺរ៉ូយ៉ាល់ និងមានការអញ្ជើញចូលរួម ពីអតិថិជនរាប់រយនាក់ គណៈគ្រប់គ្រងជាន់ខ្ពស់របស់ក្រុមហ៊ុន ព្រមទាំងអ្នកតំណាងមកពីក្រសួងសេដ្ឋកិច្ច និងហិរញ្ញវត្ថុផងដែរ។
ក្រុមហ៊ុន មេនូឡាយហ្វ៍ ជាក្រុមហ៊ុនធានារ៉ាប់រងអាយុជីវិតលំដាប់ថ្នាក់អន្តរជាតិដែលទទួលបានការជឿទុកចិត្តពីសំណាក់អតិថិជន និងមានប្រវត្តិអាជីវកម្មរបស់ខ្លួនជាង ១២៥ ឆ្នាំមកហើយដោយយើងមានប្រតិបត្តិការធំៗនៅប្រទេសកាណាដា សហរដ្ឋអាមេរិក និងទីផ្សារទាំង ១១ ក្នុងតំបន់អាស៊ី។ ក្នុងអំឡុងពេល ៤ ឆ្នាំនៃប្រតិបត្តិការអាជីវកម្មនៅកម្ពុជា ក្រុមហ៊ុន មេនូឡាយហ្វ៍ បានការពារអាយុជីវិតប្រជាជនជាង ២២ ០០០ នាក់ ជាមួយនឹងទឹកប្រាក់ធានាសរុបចំនួនជាង ៤០០ លានដុល្លារអាមេរិក។
ក្រុមហ៊ុន មេនូឡាយហ្វ៍ បានពង្រីកវិសាលភាព នៃការការពារទៅកាន់ក្រុមគ្រួសារកម្ពុជាជាច្រើនទៀតតាមរយៈ ការបើកការិយាល័យសាខារបស់ខ្លួននៅខេត្តសៀមរាប ខេត្តបាត់ដំបង និងខេត្តកំពង់ចាម។ ក្រុមហ៊ុនក៏បានចាប់ជាដៃគូជាមួយធនាគារធំៗដូចជាធនាគារ ANZ Royal ធនាគារ Maybank និងធនាគារ ABA ដើម្បីផ្ដល់ជូននូវដំណោះស្រាយលើការការពារអាយុជីវិត និងហិរញ្ញវត្ថុជូនដល់អតិថិជន។ លើសពីនេះទៀត ក្រុមហ៊ុនបានចាប់ដៃគូជាមួយក្រុមហ៊ុន Wing ដើម្បីធ្វើឱ្យការបង់បុព្វលាភរ៉ាប់រងកាន់តែងាយស្រួលជាងមុនដោយអតិថិជនអាចបង់តាមរយៈទូរស័ព្ទដៃ ឬធ្វើដំណើរទៅកាន់ភ្នាក់ងារ Wing ណាមួយដែលនៅជិតបំផុត។
នៅក្នុងកម្មវិធីប្រារព្ធខួប ៤ ឆ្នាំនេះដែរ លោក Robert Elliott អគ្គនាយកប្រតិបត្តិ និងនាយកចាត់ការទូទៅនៃក្រុមហ៊ុន មេនូឡាយហ្វ៍ ខេមបូឌា បានមានប្រសាសន៍បញ្ជាក់ពីការប្ដេជ្ញាចិត្តរយៈពេលវែងរបស់ក្រុមហ៊ុនក្នុងការផ្ដល់ជូននូវសេវាកម្ម និងផលិតផលធានារ៉ាប់រងអាយុជីវិតលំដាប់ថ្នាក់ពិភពលោករបស់ខ្លួនថា៖ «ក្រុមហ៊ុន មេនូឡាយហ្វ៍ ប្ដេជ្ញាបន្តឆន្ទៈដ៏មុតមាំរបស់យើងក្នុងការជួយក្រុមគ្រួសារកម្ពុជាកសាងអនាគតហិរញ្ញវត្ថុដ៏ប្រសើរមួយ។ យើងចង់ឱ្យអតិថិជនរបស់យើងអស់ក្ដីបារម្ភក្នុងការរស់នៅ និងប្រកបការងារប្រចាំថ្ងៃដោយដឹងថាអនាគតហិរញ្ញវត្ថុរបស់ខ្លួនត្រូវបានការពារដោយក្រុមហ៊ុន មេនូឡាយហ្វ៍។ យើងធានាថាប្រសិនបើមានហេតុការអាក្រក់ណាមួយកើតឡើងដោយមិនបានត្រៀមទុកជាមុនមកលើមេគ្រួសារ បន្ទុកហិរញ្ញវត្ថុរបស់គ្រួសារនោះនឹងមិនធ្លាក់លើប្ដី ប្រពន្ធ ឬកូនរបស់ពួកគេទេ ប៉ុន្តែវានឹងក្លាយជាបន្ទុករបស់ក្រុមហ៊ុន មេនូឡាយហ្វ៍ទៅវិញ។»
ចាប់តាំងពីការចាប់ផ្ដើមអាជីវកម្មរបស់ខ្លួននៅកម្ពុជាមក ក្រុមហ៊ុន មេនូឡាយហ្វ៍ ខេមបូឌា បានរៀបចំ ជាវគ្គសិក្ខាសាលាជាច្រើន សម្រាប់សាធារណជន និងថែមទាំងមានយុទ្ធនាការផ្សព្វផ្សាយនានា ដើម្បីជម្រុញការយល់ដឹងពីសារៈសំខាន់ នៃការធានារ៉ាប់រងអាយុជីវិត សម្រាប់ក្រុមគ្រួសារកម្ពុជា។ កិច្ចខិតខំប្រឹងប្រែងទាំងនេះ បានធ្វើឱ្យប្រជាជនគោលដៅ ៩០% ទទួលបាននូវព័ត៌មាន ទាក់ទងនឹងក្រុមហ៊ុន និងផលប្រយោជន៏នៃការធានារ៉ាប់រងអាយុជីវិត។
បន្ថែមពីកិច្ចខិតខំប្រឹងប្រែងក្នុងការបញ្រ្ជាបព័ត៌មាន ទាក់ទងនឹងអត្ថន័យនៃការធានារ៉ាប់រងអាយុជីវិត ក្រុមហ៊ុន មេនូឡាយហ្វ៍ បាននិងកំពុងដើរតួនាទីយ៉ាងសំខាន់ ក្នុងការគាំទ្រសហគមន៍ តាមរយៈការបរិច្ចាគថវិកាជូនដល់មន្ទីរពេទ្យកុមារ ការចែកកង់ និងមួកសុវត្ថិភាពជូនដល់សិស្សានុសិស្ស ដែលជួបការខ្វះខាត ការលើកកម្ពស់ការយល់ដឹង ពីសុវត្ថិភាពចរាចរផ្លូវគោក ក៏ដូចជាការលើកកម្ពស់សុខភាព និងសុខុមាលភាពតាមរយៈ ការឧបត្ថម្ភកម្មវិធីរត់ប្រណាំងពាក់កណ្ដាលម៉ារ៉ាតុងអន្តរជាតិដែលធ្វើឡើងនៅតំបន់អង្គរ ខេត្តសៀមរាបផងដែរ។